२७ असार, काठमाडौं । आज प्रकाशित पत्रपत्रिकाहरुले विविध विषयहरुलाई आफ्नो प्राथमिकतामा राखेका छन् । प्रतिनिधिसभा निर्वाचनमा तीन प्रतिशत न्यूनतम थ्रेसहोल्ड रहने प्रस्ताव गरिएको खबरलाई आजका सबैजसो पत्रपत्रिकाहरुले प्राथमिकताका साथ लेखेका छन् ।
मुख्य सचिव डा. सोमलाल सुवेदी एसियाली विकास बैंकमा जागिर खान लागेपछि मुख्य सचिवका लागि दौडधुप बढेको खबर पनि आजका पत्रपत्रिकाहरुमा छन् । नेपालमा विकासले गति लिन नसक्नुका कारणबारे पनि पत्रिकाहरुले आज उत्खनन् गरेका छन् ।
‘स्थानीय तहलाई साउनमै बजेट खर्चको अख्तियारी’ शीर्षक दिएर मुख्य खबर लेखेको गोरखापत्र दैनिकले प्रतिनिधिसभा निर्वाचन समानुपातिक सिट प्राप्त गर्न कुल सदर मतको तीन प्रतिशत थ्रेसहोल्ड प्रस्तावसहित प्रतिनिधिसभा निर्वाचन विधेयक पेश गरेको लेखेको छ । गोरखापत्रमै वर्षाले नदी किरानारामा जोखिम बढेको खबर पनि छ ।
कान्तिपुर दैनिकले समानुपातिक सिटका लागि थ्रेसहोल्ड कट्नैपर्ने लेखेको छ भने नयाँ पत्रिका दैनिकले नेपालको विकासले गति लिन नसक्नुको कारणबारे बहस छेडेको छ ।
अन्नपूर्ण पोस्ट दैनिकले अक्षयकोषबाट माओवादी नेता भागेको लेखेको छ । नागरिक दैनिकले मुख्य सचिव बन्न सचिवबीच चलेको दौडधुपबारे समाचार लेखेको छ ।
